42వ వార్డులో వైయస్ఆర్ కాంగ్రెస్ పార్టీ ఎన్నికల ప్రచారం.. కాబోయే డిప్యూటీ మేయర్ కోడిగుడ్ల పూర్ణిమ:

*42వ వార్డులో వైయస్ఆర్ కాంగ్రెస్ పార్టీ ఎన్నికల ప్రచారం.. కాబోయే డిప్యూటీ మేయర్ కోడిగుడ్ల పూర్ణిమ: మాజీ ఎమ్మెల్యే వాసుపల్లి*

-42వ వార్డు అభ్యర్థిగా కోడిగుడ్ల పూర్ణిమ ఇంటింటి ప్రచారం

-పాల్గొన్న మాజీ ఎమ్మెల్యే వాసుపల్లి గణేష్ కుమార్, వైయస్ఆర్సీపీ శ్రేణులు

-కోడిగుడ్ల పూర్ణిమను భారీ మెజారిటీతో గెలిపించాలని పిలుపునిచ్చిన నాయకులు

గ్రేటర్ విశాఖపట్నం నగరపాలక సంస్థ పరిధిలోని 42వ వార్డులో వైయస్ఆర్ కాంగ్రెస్ పార్టీ ఆధ్వర్యంలో ఎన్నికల ప్రచారం ఘనంగా నిర్వహించారు. 42వ వార్డు కార్పొరేటర్ అభ్యర్థి, మాజీ స్టాండింగ్ కమిటీ సభ్యురాలు కోడిగుడ్ల పూర్ణిమతో కలిసి దక్షిణ నియోజకవర్గం సమన్వయకర్త, మాజీ ఎమ్మెల్యే వాసుపల్లి గణేష్ కుమార్ వార్డులో విస్తృతంగా పర్యటించారు. ఈ ప్రచార కార్యక్రమంలో భాగంగా స్థానిక ప్రజలను కలుసుకుంటూ, వైయస్ఆర్సీపీ ఎన్నికల గుర్తు అయిన 'ఫ్యాన్' గుర్తుకు ఓటు వేసి భారీ మెజారిటీతో గెలిపించాలని కోరారు. ఈ సందర్భంగా మాజీ ఎమ్మెల్యే వాసుపల్లి గణేష్ కుమార్ మాట్లాడుతూ.. కార్పొరేటర్ అభ్యర్థి కోడిగుడ్ల పూర్ణిమ సమర్థతను, ఆమె గతంలో అందించిన సేవలను కొనియాడారు. 42వ వార్డు ప్రజలు ఆమెను అత్యధిక ఓట్లతో గెలిపించి గ్రేటర్ కౌన్సిల్‌కు పంపిస్తే, ఆమె రాబోయే కాలంలో డిప్యూటీ మేయర్ పదవిని అధిష్టించడం ఖాయమని స్పష్టం చేశారు. పూర్ణిమ గెలుపు వార్డు అభివృద్ధితో పాటు నగర స్థాయిలోనే కీలక మలుపు తిరుగుతుందని, ప్రజల సమస్యల పరిష్కారానికి ఆమె ఎప్పుడూ ముందుంటారని భరోసా కల్పించారు. అనంతరం కోడిగుడ్ల పూర్ణిమ మాట్లాడుతూ.. వార్డులో రోడ్లు, కాలువలు, తాగునీరు వంటి మౌలిక వసతులు కల్పనకు పకడ్బందీగా చర్యలు చేపడుతూ, ప్రజల సమస్యలు పరిష్కారం కోసం నిరంతరం అందుబాటులో ఉంటానని అన్నారు. గత కొన్ని రోజులుగా ఇంటింటి ప్రచారం నిర్వహిస్తుండగా స్థానిక ప్రజల నుంచి విశేష స్పందన లభిస్తుందని ఆమె తెలిపారు. మేయర్ అభ్యర్థి వరుదు కళ్యాణి తో పాటు కార్పొరేటర్ గా తనను భారీ మెజార్టీతో గెలిపించాలని ఓటర్లను అభ్యర్థించారు. వార్డు ప్రజలు, మహిళలు, పార్టీ కార్యకర్తలు డప్పు వాయిద్యాలతో, మంగళహారతులు పడుతూ ఘన స్వాగతం పలికారు. ఈ కార్యక్రమంలో స్థానిక వైయస్ఆర్సీపీ నాయకులు, కార్యకర్తలు పెద్ద సంఖ్యలో ఉత్సాహంగా పాల్గొన్నారు.