మన కూరగాయల తోట మనమే పెంచుకుందాం అని గ్రీన్ క్లైమేట్ టీం ఎన్జిఒ వ్యవస్థాపక కార్యదర్శి

మన కూరగాయల తోట మనమే పెంచుకుందాం అని గ్రీన్ క్లైమేట్ టీం ఎన్జిఒ వ్యవస్థాపక కార్యదర్శి జెవి రత్నం పిలుపునిచ్చారు. సోమవారం ఉదయం హెచ్ పిసిఎల్ వాల్తేర్ క్లబ్ లో హెచ్ పిసిఎల్ హెచ్ ఆర్ అసిస్టెంట్ మేనేజర్ డి. రాజేశ్వరరావు అధ్యక్షతన గ్రీన్ క్లైమేట్ టీం మన కూరగాయల తోట కార్యక్రమంలో భాగంగా దేశీయ నలుపు, తెలుపు వంగ నారు, టమాటా, పచ్చిమిర్చి, బంతి నారు మొక్కలు పంపిణీ చేసిన తర్వాత ఆయన మాట్లాడారు. రసాయన ఎరువులు లేని కూరగాయలు ఆరోగ్యకరం అన్నారు. దీనిని దృష్టి లోనికి తీసుకొని ప్రతి ఏటా విశాఖపట్నంలో వేలాది మందికి దేశీయ కూరగాయ, ఆకుకూరల విత్తనాలు, నారు పంపిణీ చేస్తున్నామని వివరించారు. కూరగాయలు ఇంటి వద్ద పెంచుకుంటే మానసిక ఒత్తిడి తగ్గుతుంది అని పేర్కొన్నారు. అలాగే ఆరోగ్యంగా ఉంటుందని చెప్పారు. అంతేకాక ఇంటిలోనే అందరికీ ప్రశాంతంగా ఉంటుందని వివరించారు. వేడెక్కుతున్న శీతోష్ణస్థితి పరిస్థితుల్లో ఇంటి పై కప్పు మీద కూరగాయలు పెంచితే వేడి తగ్గుతుంది అని తెలియజేశారు. విశాఖ నగరంలోని ప్రతి ఒక్కరూ మన కూరగాయల తోటను ఆదరించాలని కోరారు.
ఈ కార్యక్రమంలో వాల్తేర్ క్లబ్ లోని పలువురు మహిళలు, సిబ్బంది, హెచ్ పి సీఎల్ ఉద్యానవన శాఖ అధికారి లక్ష్మి , గ్రీన్ క్లైమేట్ టీం ఎన్జీవో సమన్వయకర్త జె రాజేశ్వరి తదితరులు పాల్గొని మాట్లాడారు.