కూటమి ప్రభుత్వంలోనే దళారుల దందాకు తెరలేపారా?*

*మత్స్యకారుల పథకాల్లో భారీ స్కామ్!*

*డీజిల్ సబ్సిడీ కార్డుల పేరుతో మత్స్యకారుల సొమ్ము దోపిడీ?*

*కూటమి ప్రభుత్వంలోనే దళారుల దందాకు తెరలేపారా?*
*మంత్రి అచ్చెన్నాయుడు దీనికి బాధ్యత వహించరా?*

విశాఖపట్నం: మత్స్యకారుల సంక్షేమం కోసం ప్రభుత్వం అమలు చేస్తున్న పథకాల్లో భారీ స్థాయిలో అక్రమాలు జరుగుతున్నాయనే ఆరోపణలు రోజురోజుకూ బలపడుతున్నాయి. ముఖ్యంగా డీజిల్ సబ్సిడీ కార్డుల వ్యవహారంలో మత్స్యకారుల సొమ్మును దళారుల ద్వారా దోచుకుంటున్నారని ఈస్ట్ కోస్ట్ మెకనైజ్డ్ ఫిషింగ్ బోట్ ఓనర్స్ అసోసియేషన్ ఆఫ్ ఇండియా అధ్యక్షుడు వాసుపల్లి జానకిరామ్ ఈ రోజు మీడియా సమావేశంలో తీవ్ర ఆందోళన చెందారు .

కూటమి ప్రభుత్వం అధికారంలోకి వచ్చిన తర్వాత మెకనైజ్డ్, మోటరైజ్డ్ బోట్లకు సంబంధించిన డీజిల్ సబ్సిడీ కార్డులు నెలల తరబడి పనిచేయకపోవడం ఏమిటి? వేటకు వెళ్లే నిజమైన బోటు యజమాని కార్డు పనిచేయక సబ్సిడీ పొందలేకపోతుంటే, వేటకు వెళ్లని బోటు కార్డు కొన్ని ఎంపిక చేసిన డీజిల్ బంకుల్లో ఎలా స్వైప్ అవుతోంది? ఇది కేవలం సాంకేతిక సమస్యా? లేక సబ్సిడీ నిధులను మళ్లించే వ్యవస్థీకృత వ్యవహారమా?

—కొంతమంది కూటమి ప్రభుత్వానికి అనుకూలంగా ఉన్న రాజకీయ నాయకులు, వారి అనుచరులు లేదా దళారులు మత్స్యకారుల డీజిల్ సబ్సిడీ కార్డులను సేకరించి, “మీ కార్డు పనిచేయదు… మీకు సబ్సిడీ డబ్బులు రావు, మీ బోట్ వేటకు వెళ్ళలేదు, మీ బోట్లలో కళాసీలకు మత్స్యకార భరోసా డబ్బులు రావు” అంటూ మత్స్యకారులను బెదిరించి, నమ్మించి, లీటరుకు కేవలం రూ.1 లేదా రూ.2 చెల్లించి కార్డులను తీసుకుంటున్నారనే ఆరోపణలు ఉన్నాయి. ఆ కార్డులను ఎంపిక చేసిన కాకినాడ రిటైల్ అవుట్‌లెట్లలో స్వైప్ చేసి, మిగిలిన సబ్సిడీ మొత్తాన్ని అక్రమంగా మళ్లించుకుంటున్నారనే ఆరోపణలు వినిపిస్తున్నాయి. దీనిపై ఈ రాష్ట్ర ముఖ్యమంత్రి నారా చంద్రబాబు నాయుడు గారు బాధ్యత వహించాలి అని వాసుపల్లి జానకిరామ్ డిమాండ్ చేశారు.

ఈ వ్యవహారంలో నిజానిజాలు తేల్చాల్సిన బాధ్యత ప్రభుత్వానిదే. ఒక నిజమైన మెకనైజ్డ్ బోటు యజమాని నెలకు సుమారు రూ.27,000 మోటరైజ్డ్ బోట్ యజమానికి 2,700/- నెలకు నష్టపోతున్న పరిస్థితి ఎందుకు ఏర్పడింది? మత్స్యకారుడి హక్కైన సబ్సిడీ అతనికి అందకుండా, మధ్యవర్తులు లాభపడుతున్నట్లయితే దీనికి బాధ్యులు ఎవరు?
ఈ విషయం పై ఇప్పటికే ముఖ్యమంత్రి చంద్రబాబు నాయుడు గారికి మత్స్యశాఖ మంత్రి అచ్చం నాయుడు గారికి లేఖ రాసి పిర్యాదు చేయడం జరిగింది, అయినా ప్రభుత్వం నుండి ఎటువంటి స్పందన లేదు అని జానకిరామ్ ఆవేదన చెందారు.